கருடன் தவம் செய்த பாறையில் அருள்பாலிக்கும் லட்சுமி நரசிம்மர்.

 அந்திலி அப்பன்.



கருடன் தவம் செய்த பாறையில் அருள்பாலிக்கும் லட்சுமி நரசிம்மர்.

சில திருத்தலங்கள் பெரும் ராஜகோபுரங்களால் பிரசித்தி பெறுகின்றன.


 சில தலங்கள் அங்கு வீசும் காற்றின் அமைதியால் மனதை கொள்ளை கொள்கின்றன. 


அப்படிப்பட்ட ஒரு அபூர்வ தலம் தான் அந்திலி கிராமத்தில் அருள்பாலிக்கும் லட்சுமி நரசிம்மர் திருக்கோவில்.

சமீபத்தில் ஆதி திருவரங்க பெருமாள் கோவில் தரிசனத்திற்கு சென்றபோது, திருக்கோவிலூர் அருகே உள்ள இந்த புனிதத் தலத்திற்குச் செல்லும் அரிய வாய்ப்பு கிடைத்தது.

 தென்பெண்ணை கரையில் அமைந்த தெய்வீக அமைதி.


தென்பெண்ணை ஆறு அருகில், இயற்கை நிசப்தத்தில் மூழ்கிய ஒரு சிறிய குன்றின் மேல் அமைந்துள்ளது இந்த ஆலயம்.


 நகர சத்தங்களிலிருந்து தள்ளி, மனம் முழுவதும் இறைவனின் சந்நிதியில் கரையும் அளவுக்கு அமைதி நிறைந்த இடம் இது.

 கருடனின் தவமும், நரசிம்மரின் அருளும்.


ஸ்தல புராணம் மிகவும் அபூர்வமானது.

Sri மகா விஷ்ணு, பக்த பிரகலாதனை காப்பாற்ற நரசிம்ம அவதாரம் எடுக்கப் போனபோது, தனது வாகனமான கருடரை அழைத்து செல்லவில்லை என்கிறது கதை.

 இதனால் வருந்திய கருடர், “நரசிம்ம ரூபத்தை நான் நேரில் தரிசிக்க வேண்டும்” என்ற ஏக்கத்தில், இந்த குன்றில் அமர்ந்து கடும் தவம் மேற்கொண்டார்.

அவரது தவத்தின் தீவிரத்தால் மூவுலகமும் உஷ்ணம் அடைந்ததாக கூறப்படுகிறது. 


தேவர்கள் விஷ்ணுவிடம் முறையிட்டனர்.

அப்போது  Sri மகாவிஷ்ணு, Sri மகாலட்சுமியுடன் அந்திலி வந்து, கருடரின் முன் சாந்தமூர்த்தியான லட்சுமி நரசிம்மராக காட்சி தந்தார். 


அந்த அருள்பாலிக்கும் வடிவமே இன்று இங்கு தரிசிக்கக் கிடைக்கிறது.

 கருடன் போலத் தோன்றும் பாறை:

இந்த ஆலயத்தின் மிகப் பெரிய விசேஷம் — கோவிலை தாங்கி நிற்கும் பாறை.

கருடர் தவம் செய்ததாக நம்பப்படும் அந்த பாறை, பக்கவாட்டில் பார்த்தால் கருடன் சிறகுகளை விரித்து அமர்ந்திருப்பது போலத் தோன்றும்.


 இது பக்தர்களை ஆச்சரியத்தில் ஆழ்த்தும் தெய்வீக சின்னமாக விளங்குகிறது.

 எளிமையிலே எட்டாத அழகு:



இந்தத் தலம் திவ்யதேசங்களில் ஒன்று அல்ல. 

ஆனாலும் தமிழ்நாட்டில் உள்ள முக்கிய நரசிம்ம க்ஷேத்ரங்களில் ஒன்றாக பக்தர்கள் போற்றுகின்றனர்.



கர்ப்பகிரகம் சிறியது. நரசிம்மர் விக்கிரகமும் அளவில் சிறியது. ஆனால் முகத்தில் பொங்கும் கருணை, லட்சுமி தாயாருடன் சாந்தமாய் அமர்ந்திருக்கும் அந்த திருமேனி — சொல்ல முடியாத ஆனந்தத்தை அளிக்கிறது.


இங்கு ஒரு மத்வ அர்ச்சகர் பக்தியுடன் பூஜைகள் செய்து வருகிறார். எளிமை, தூய்மை, ஆன்மிக ஒழுக்கம் — மூன்றும் இங்கு தெளிவாக உணரப்படுகின்றன.


 திவ்ய அனுபவம்

தரிசனத்திற்கு முன் அர்ச்சகரிடம் கேட்டுக் கொண்டு பெருமாளுக்கு சர்க்கரை பொங்கல் நைவேத்தியம் செய்தேன்.

பின்னர் அந்த பிரசாதத்தைத் தொன்னையில் வைத்து, கோயிலின் பின்புறம் நின்ற அரசமரத்தின் அடியில் அமர்ந்து சாப்பிட்ட அனுபவம் — அது சாதாரண உணவு அல்ல; அது பரம ஆனந்தம்.

அருகில் ஒரு அனுமன் கோயிலும் உள்ளது. இத்தலம் தீராத நோய்களை தீர்க்கும் நரசிம்ம க்ஷேத்ரம் என்று பட்டர் கூறினார். நம்பிக்கையுடன் வரும் பக்தர்கள் மன அமைதியுடனும் நம்பிக்கையுடனும் திரும்பிச் செல்கின்றனர்.

 தரிசன பலன்:



இந்த இடத்தில் ஒரு விசேஷம் —
ஒருமுறை வந்தால் உடனே கிளம்ப மனம் வராது.

அமைதி, இயற்கை, அருள் — மூன்றும் ஒன்றாக கலந்து இருக்கும் தலம் இது.

நரசிம்ம பக்தர்கள் விழுப்புரம் அல்லது திருக்கோவிலூர் தங்கி,

ஆதி திருவரங்க பெருமாள் கோவில்

உலகளந்த பெருமாள் கோவில்

அந்திலி அப்பனான லட்சுமி நரசிம்மர்

என மூன்று தலங்களையும் தரிசித்து ஆன்மிகப் பலன் அடையலாம்.